Yrkes-NM i gang i Førde

Unge fagarbeidarar i 10 forskjellege fag møtes til venleg konkurranse om å bli Noregsmeister på yrkes-NM i Førde.

02.04.2025 av Eskild Hustvedt
Sist oppdatert: 02.04.2025

– Det er utruleg gøy å sjå dei beste unge fagarbeidarane i Noreg utøve faget sitt, seier Helge Sporsheim i Fagforbundet.

Han er i Førde for å bidra til gjennomføringa av yrkes-NM i helsearbeidarfaget.

– Du kan ikkje sjå desse ungdommane konkurrere utan å bli positiv for framtida, seier Sporsheim.

Han er oppteken av å få gode ambassadørar som kan inspirere neste generasjons helsefagarbeidarar.

– Noreg manglar fagarbeidarar. Yrkeskonkurransar er ein flott måte å vise fram faget for ungdom som skal velje retning på vidaregåande, seier han.

Konkurransen er 1.-3. april. Vinnaren av yrkes-NM får sjansen til å delta på Noregs yrkeslandslag som skal til yrkes-EM i Herning, Danmark i haust.

Vil du følgje konkurransane? Fagforbundet straumar yrkes-NM på Facebook.