Helge Sporsheim, nestleiar av yrkesseksjon helse og sosial i Fagforbundet, reiser til Herning for å følgje den norske utøvaren i helsearbeidarfaget, Henrik Solberg Bølgenhaugen, som kjem ifrå Ringerike.
– Eg gler meg veldig! Henrik er ein fantastisk ambassadør for Noreg, seier Sporsheim.
Henrik kvalifiserte seg til EM ved å vinne det norske yrkes-NM i helsearbeidarfaget, som vart gjennomført i Førde i april.
Henrik utgjer, saman med 16 andre, det norske yrkeslandslaget. Helsearbeidarfaget har sju land som deltek i årets europameisterskap. I tillegg til Noreg, deltek også Tyskland, Danmark, Spania, Kroatia, Ungarn og Storbritannia.
– Henrik er fagleg sterk, det er absolutt sjansar for pallplass i helsearbeidarfaget i år, avslører Sporsheim.
Ventar 100 000 besøkjande
WorldSkills Danmark, som har ansvaret for konkurransen, ventar inntil 100 000 besøkjande i laupet av dei fire dagane med konkurransar.
Om du ynskjer å følgje konkurransane, og særleg Henrik, kjem Fagforbundet til å publisere fortlaupande både på nettsida og på Facebook-sida «Fagforbundets helsefagarbeidere og hjelpepleiere», WorldSkills Norway publiserer òg på sine nettsider, og si Facebook-side. Opnings- og avslutningssermoniane blir òg strauma av WorldSkills.